Kryetari i Lidhjes Demokratike të Kosovës, Lumir Abdixhiku ka kritikuar ashpër qeverinë në detyrë për refuzimin e ofertës për krijimin e një qeverie uniteti.
Në fjalimin e tij para mbledhjes së Këshillit të Përgjithshëm të kësaj partie, ai tha se LDK-ja ofroi mundësi për kapërcimin e krizës dhe për një qeverisje të bashkuar, por kjo u injorua.
Derisa shtoi se VV mendoi që ‘shumica falet, e nuk fitohet’.
“Ju ofruam siç e dini edhe unitet, e refuzuan. U tallën me qeverinë e unitetit, jua ofruam edhe kapërcimin e krizës, të ngërçit financiar e buxhetor. Na votoni qeverinë na thoshin, thua se shumica falet e nuk fitohet. Na votoni ministrat, kryeministrat, cilindo, vetëm na leni të qëndrojmë edhe disa ditë në pushtet. Bllokada ka qenë qëllim në vetvete që nga fillimi, bllokada nuk ka qenë aksident”, tha Abdixhiku.
Ai ndër tjerash u bëri thirrje mërgatës për të votuar në zgjedhjet e 28 dhjetorit.
“Vota juaj nuk është thjesht një votë e zakonshme, por amanet dhe përgjegjësi për fatin e vendit tonë. Kosova ka nevojë për mërgatën tonë, për juve dhe pjesëmarrjen tuaj masive. Ju e keni ndryshuar rezultatin në zgjedhjet e fundit lokale, vazhdoni të ndryshoni rezultatin edhe në zgjedhjet nacionale”, tha ai.
Po ashtu, Abdixhiku u shpreh i gatshëm për kandidimin e tij për kryeministër të Kosovës, duke shpresuar që Zoti t’i japë dije dhe maturi për t’i prirë kësaj gare.
“Ky aprovim para se të jetë privilegj është përgjegjësi e madhe që më vihet mbi supe dhe për të cilën jam gati. I gatshëm të ecim bashkë dhe të mbaj peshën e kësaj detyre në emrin tuaj. Shpresoj që Zoti të më jap forcë, dije e maturi t’ju prijë në këtë garë me dinjitet”.
