Pishina e Gërmisë u mbyll shkaku i dyshimeve se uji nuk i përmbush kushtet bazë
Një javë pas hapjes zyrtare, dyert e pishinës publike të Gërmisë janë mbyllur të martën me kërkesë të Inspektoratit Sanitar.
Burime brenda këtij inspektorati i kanë thënë KOHËS se kërkesa për mbylljen e pishinës është bërë shkaku i dyshimit se cilësia e ujit nuk i përmbush kushtet që ajo të mbahet hapur.
E hapja, sipas burimit, do të bëhet kur të kryhet analiza e mostrës së ujit dhe të konfirmohet plotësimi i kritereve të parapara me Rregulloren për Pishina.
Version ndryshe kanë dhënë në menaxhmentin e pishinës. Menaxheri Mërgim Mula ka thënë se vendimi për mbyllje të përkohshme është marrë nga drejtuesit e saj.
Në ndërmarrjen “Sports Marketing”, që e menaxhon pjesërisht Pishinën e Gërmisë, kanë bërë të ditur në një postim në Facebook se vendimi është marrë me qëllim që ujit t’i bëhen analizat, sipas udhëzimeve të përcaktuara.
Lexo edheSot temperaturat deri në 32 gradë Celsius
“Kemi vendosur që të mbyllim Pishinën e Gërmisë deri në rihapje, këtë të shtunë, në mënyrë që t’i kryejmë edhe një herë analizat e ujit, ashtu siç kemi vepruar vazhdimisht, duke i testuar edhe pompat e filtrimit, sipas udhëzimeve të përcaktuara”, thuhet në njoftim.
Në Departamentin e Ekologjisë Humane në Institutin Kombëtar të Shëndetësisë Publike (IKSHPK) kanë thënë se për analizën e mostrës së ujit nga pishina, kërkesa nga menaxhmenti i pishinës është adresuar të martën.
“Ne e kemi informuar Institutin Sanitar se nëse kërkohet asistenca jonë, ne do ta ofrojmë. Pishina e Gërmisë, sot, më 15.7.2025, na ka kontaktuar me kërkesë për të bërë analiza të rregullta të ujit gjatë sezonit veror 2025”, ka thënë Ergyl Bince, drejtor i Departamentit të Ekologjisë Humane në IKSHPK.
KOHA ka raportuar javën e shkuar se Pishina e Gërmisë është hapur zyrtarisht, pa u mbushur e tëra me ujë, teksa ka përcjellë edhe ankesat e disa vizitorëve për cilësi jo të mirë të ujit.
