Kryeministri në detyrë i Republikës së Kosovës, Albin Kurti, ka pritur sot në një takim zyrtar Shefin e Zyrës së Bashkimit Evropian në Kosovë, ambasadorin Aivo Orav.
Në takim ishin të pranishëm edhe ministri në detyrë i Shëndetësisë, Arben Vitia, si dhe ministri në detyrë i Financave, Punës dhe Transfereve, Hekuran Murati, trsmeton lajmi.net
Gjatë bisedës, palët diskutuan mbi bashkëpunimin ndërmjet Kosovës dhe Bashkimit Evropian, me theks të veçantë në procesin e integrimit evropian të vendit.
Kryeministri Kurti theksoi përkushtimin e Qeverisë për vazhdimin e reformave të ndërmarra gjatë këtij mandati, duke nënvizuar rëndësinë që i është dhënë të drejtave të komuniteteve dhe integrimit të tyre të plotë në shoqëri, pa dallim etnie apo përkatësie.
Në takim u trajtuan gjithashtu edhe çështje aktuale që lidhen me zhvillimet në vend, përfshirë fushat e shëndetësisë, ekonomisë dhe bashkëpunimit ndërinstitucional me institucionet evropiane./Lajmi.net/
