Këshilltari Special në Departamentin Amerikan të Shtetit, Derek Chollet në një bisedë me Kryeministrin e Kosovës, Albin Kurti ka thënë se serbëve duhet t’u lejohet mbajtja e zgjedhjeve me 3 prill në Kosovë, shkruan Gazeta Metro.
Në një postim në Twitter, Chollet, ka përmendur rëndësinë që qytetareve serbë t’u bëhet e mundur që të votojnë për zgjedhjet e 3 prillit.
“Pata një bisedë të mirë me Kurtin sot. E falënderova atë për mbështetjen e fortë ndaj Ukrainës dhe theksova rëndësinë që qytetarët me të drejtë vote në Kosovë që të mund të marrin pjesë në zgjedhjet e ardhshme kombëtare serbe të 3 prillit”, ka shkruar Chollet në Twitter.
Më 19 shkurt, institucionet e Kosovës nuk e kanë lejuar mbajtjen e referendumit serb për disa ndryshime kushtetuese, sipas kërkesës së Beogradit.
Qeveria e Kosovës ka thënë për këtë se ata mund të votojnë me postë ose përmes zyrës ndërlidhëse. /gazetametro.net
