Neymari i ka nxitur edhe më shumë spekulimet për një transferim të mundshëm në Barcelonë, duke e postuar një video ku shihet një fotografi e tij me fanellën e klubit katalonas, pranë një mesazhi nga Bibla.
Vetëm dy vjet pasi u largua nga Camp Nou për Paris Saint-Germainin, duke u bërë lojtari më i shtrenjtë në histori të futbollit, braziliani tani po e kërkon një tjetër transferim, transmeton Gazeta Express.
Katalonja duket se është destinacioni i tij i preferuar, përderisa beteja mes tij, Barcelonës dhe Paris Saint-Germainit për të ardhmen e tij vazhdon të jetë e zjarrtë.
Dhe përderisa ende nuk duket se është arritur ndonjë marrëveshje mes dy klubeve për transferimin e Neymarit, braziliani e bëri vetë lëvizjen e fundit duke e postuar një video të çuditshme në Instagram.
Neymar keeping everyone guessing on Instagram. pic.twitter.com/yOtOuPIQb6
— Get French Football News (@GFFN) July 13, 2019
Në kripin e postuar shihet Neymari me një fanellë të Barcelonës, edhe pse fotoja është e shkrepur në bardhezi. Kjo foto është pranë një fjalie nga Bibla, me të cilën Neymari i goditi kritikët e tij.
Teksti i plotë i Isaiah 54:17, i publikuar në gjuhën portugeze në videon e postuar nga Neymari, është si në vijim:
“Asnjë armë e sajuar kundër teje nuk do të ketë sukses,
Dhe çdo gjuhë që do të ngrihet të gjykojë kundër teje,
Ti do ta dënosh.
Kjo është trashëgimia e shërbëtorëve të Zotit,
Dhe drejtësia e tyre vjen nga unë
thotë Zoti”.
Presidenti i Barcelonës, Josep Maria Bartomeu, e konfirmoi në fillim të korrikut se Neymari dëshiron të largohet, por PSG-ja s’dëshiron ta shesë. Drejtori sportiv i klubit francez, Leonardo, reagoi duke thënë se PSG-ja është e gatshme ta shesë Neymarin këtë verë për çmimin e duhur.
Pas kësaj, Neymari nuk u kthye në Paris për turneun parasezonal dhe përgatitjet për sezonin e ri. PSG-ja reagoi duke bërë të ditur se do ta ndëshkojë brazilianin për këtë veprim.
Në përjashtim të këtij mesazhi biblik të fundit, Neymari nuk i ka komentuar spekulimet e kësaj vere. /Gazeta Express/
