Pasi e shtyu me një vit, koronavirusi po modifikon jo pak edhe mënyrën e organizimit të Kampionatit Europian që pritet të startojë më 11 qershor të këtij viti dhe të luhet në 12 qytete të ndryshme të Europës.
Kështu siç raporton britanikja “The Times”, UEFA ka vendosur që të lejojë përfaqësueset pjesëmarrëse të paraqiten në kompeticion me 26 futbollistë në dispozicion, ndryshe nga sa ka ndodhur tradicionalisht me vetëm 23 lojtarë.
Ky vendim i UEFA-s pritet të zyrtarizohet në orët e ardhshme dhe vjen pas një kërkese publike të nisur nga trajneri i Italisë, Roberto Mancini, të cilit iu bashkuan më pas edhe shumë kolegë të tjerë.
“Zgjerimi i listës me 25 apo 26 futbollistë do të ishte diçka shumë pozitive, pasi vijmë pas një sezoni mjaft intensiv dhe për më tepër do të luhet në kushtet e pandemisë. Imagjinoni nëse na preken disa futbollistë nga koronavirusi dhe më pas do të jetë gati e pamundur të gjesh lojtarë, pasi shumë prej tyre do të jenë me pushime”, pati deklaruar Mancini disa ditë më parë.
