Zëvendësministri i Jashtëm dhe i Diasporës i Kosovës, Kreshnik Ahmeti, po zhvillon një vizitë dyditore pune në Malajzi që nis të enjten, me synim thellimin e lidhjeve dypalëshe dhe eksplorimin e fushave të reja të bashkëpunimit.
Në një deklaratë të enjten, Ministria e Jashtme e Malajzisë tha se vizita është vazhdim i vizitës zyrtare të Presidentes së Kosovës, Vjosa Osmani Sadriu, në Malajzi në fillim të majit të këtij viti.
Ahmeti pritet të takohet me zëvendësministrin e Jashtëm Datuk Mohamad Alamin, i cili gjithashtu do të organizojë një drekë në nder të tij.
“Të dyja palët pritet të zhvillojnë diskutime mbi tregtinë dhe investimet, financat islame, industrinë hallall dhe turizmin”, thuhet në deklaratën e Ministrisë së Jashtme, shkruan “The Malaysyan Reserve”.
Dy zëvendësministrat gjithashtu do të shkëmbejnë pikëpamje mbi çështje rajonale dhe ndërkombëtare me interes të përbashkët, thuhet më tej.
Gjatë vizitës, Ahmeti pritet gjithashtu të zhvillojë diskutime me Korporatën për Zhvillimin Hallall (HDC) për të eksploruar bashkëpunime të mundshme në sektorin hallall, shkruan media malajziase.
Në vitin 2024, tregtia dypalëshe totale ndërmjet Malajzisë dhe Kosovës arriti në 28.55 milionë, duke përfshirë 25.92 milionë në eksporte nga Malajzia dhe 2.63 milionë në importe nga Kosova.
Eksportet kryesore nga Malajzia përfshijnë vajin e palmës, produkte elektrike dhe elektronike, dhe mallra të prodhuara, ndërsa importet nga Kosova përbëhen kryesisht nga lëndë të para dhe gurë gjysmë të çmuar.
