Spanja është vendi i pestë pas Sllovenisë, Irlandës, Islandës dhe Holandës që njofton zyrtarisht se nuk do të marrë pjesë në Festivalin e Këngës Eurovision 2026 nëse Izraeli merr pjesë.
Anëtarët e bordit të transmetuesit shtetëror RTVE votuan me shumicë votash për të bojkotuar konkursin nëse Izraeli është midis vendeve që paraqesin një kandidaturë vitin e ardhshëm, transmeton balkanweb.
Kjo e bën Spanjën të parën nga të ashtuquajturat “Pesë vendet e Mëdha” të Eurovisionit (Franca, Gjermania, Italia dhe Mbretëria e Bashkuar) që merr këtë vendim në përgjigje të sulmit izraelit në Gaza.
Vendimi u mor në të njëjtën ditë kur një hetim i OKB-së arriti në përfundimin se Izraeli po kryente gjenocid në Gaza.
RTVE tha në një deklaratë se propozimi për t’u tërhequr nga eventi i vitit 2026 u miratua me 10 vota pro, katër kundër dhe një abstenim.
“Në korrik, RTVE i kërkoi EBU-së (Bashkimit Evropian të Transmetimeve, i cili organizon Eurovisionin) të fillonte një diskutim serioz dhe të thelluar në lidhje me pjesëmarrjen e Izraelit në festivalin e ardhshëm të Eurovisionit. Vende të tjera mbështetën kërkesën e Spanjës”, tha transmetuesi spanjoll në një deklaratë.
Duhet theksuar se shërbimi kombëtar publik i transmetimit të Izraelit, Kan, i cili është kërcënuar me privatizim nga Benjamin Netanyahu, ka vendosur tashmë të marrë pjesë në konkursin e këngës. Konkursi i ardhshëm i këngës në Eurovision do të mbahet në Vjenë në maj.
