Sindikata e Policisë së Kosovës ka reaguar ashpër ndaj sulmit ndaj dy zyrtarëve policorë në Viti.
Ngjarja ka ndodhur në fshatin Drobesh të komunës së Vitisë, ku tre persona të dyshuar kanë sulmuar dy zyrtarë policorë gjatë kryerjes së detyrës zyrtare.
Në reagimin e saj zyrtar, Sindikata e cilëson këtë akt si një cenim të drejtpërdrejtë ndaj autoritetit të ligjit dhe kërkon që organet e drejtësisë të jenë të pakompromis në ndëshkimin e atyre që cënojnë sigurinë e zyrtarëve policorë.
“Dhuna ndaj pjesëtarëve të Policisë është e papranueshme dhe kërkon ndëshkim të menjëhershëm. U bëjmë thirrje organeve të drejtësisë që të veprojnë me vendosmëri ndaj kujtdo që ushtron dhunë ndaj zyrtarëve në detyrë”, thuhet në reagimin e Sindikatës, raporton lajmi.net
Përveç thirrjes ndaj drejtësisë, Sindikata ka apeluar edhe te qytetarët e Kosovës që të respektojnë urdhrat e zyrtarëve policorë dhe të mbështesin institucionin e Policisë si shtyllë themelore të rendit dhe sigurisë.
“Policia e Kosovës është mburoja e qytetarëve tanë dhe garantuese e rendit kushtetues – prandaj meriton respekt dhe mbështetje të vazhdueshme”, thuhet më tej në komunikatë.
Sindikata ka përsëritur angazhimin e saj për të qëndruar në përkrahje të çdo zyrtari policor në përmbushje të misionit të tij ligjor dhe profesional. Rasti aktual është duke u hetuar nga organet kompetente./Lajmi.net/
