Prokurorja Drita Hajdari, ka thënë se është e zhgënjyer pas vendimit të Gjykatës Themelore të Prishtinës, vendim ky që i la të lirë 11 të akuzuarit e rastit “Pronto”.
“Si prokurore e rastit deklaroj se jam e zhgënjyer me aktgjykimin lirues të gjykatës së instancës së parë. Mirëpo, këtu nuk përfundon gjithçka, unë do të ankohem dhe me bazë pres një vendim ndryshe nga Gjykata e Apelit”, ka thënë Hajdari, shkruan Insajderi.
“Sidoqoftë, unë si prokurore e kam kryer punën time sipas provave që i kam pas, dhe ndaj personave për të cilët kam pas prova të sigurta se me veprimet e veta kanë kryer veprat penale”.
“Në atë mënyrë, ne si prokurori kemi demonstruar se askush nuk është i paprekshëm dhe se askush nuk është mbi ligjin dhe se mund të ndiqen penalisht dhe të akuzohen të gjithë, pavarësisht nga pozita apo statusi i tyre shoqëror. Mirëpo, për fat të keq gjykata e shkallës së parë mendoj ndryshe”.
“Mbetët ta shohim me çfarë arsye është udhëhequr kjo gjykatë për lirimin e të akuzuarve dhe cilat janë ato prova që sipas mendimit të tyre mungojnë për të vërtetuar fajësinë e të akuzuarve në këtë rast”.
