Polonia dhe Italia nuk do të bashkohen me Bordin e Paqes të Presidentit amerikan Donald Trump, njoftuan të mërkurën autoritetet e Varshavës dhe Romës.
Fillimisht, Bordi i Paqes u konceptua për të mbështetur armëpushimin në Gaza, por Trump synon që ai të ketë një rol më të gjerë në zgjidhjen e konflikteve globale, gjë që disa vende e shohin si mundësi që mund të rivalizojë me Organizatën e Kombeve të Bashkuara, shkruan Reuters.
Fakti që edhe Rusia dhe Bjellorusia janë ftuar të bashkohen ka bërë që shumë vende perëndimore të marrin një qasje të kujdesshme.
“Duke marrë parasysh disa dyshime kombëtare lidhur me formën e bordit, nën këto rrethana Polonia nuk do të marrë pjesë në punën e Bordit të Paqes, por ne do ta analizojmë situatën,” tha kryeministri i Polonisë, Donald Tusk, në një mbledhje qeveritare.
“Marrëdhëniet tona me Shtetet e Bashkuara kanë qenë dhe do të mbeten prioriteti ynë, kështu që nëse rrethanat ndryshojnë dhe do të na lejojnë të bashkohemi me Bordin, ne nuk përjashtojmë asnjë skenar”, tha ai.
Ndërkohë, ministri italian i Jashtëm, Antonio Tajani, konfirmoi gjithashtu të mërkurën se Italia nuk do të jetë pjesë e Bordit të Paqes.
“Ne nuk mund të bashkohemi me Bordin e Paqes sepse ekziston një pengesë kushtetuese e pakapërcyeshme në anën e Italisë,” tha ai për kanalin e lajmeve Sky TG24.
“Sidoqoftë, nëse do të ketë nevojë për të punuar në përpjekje rindërtimi për të siguruar paqen në Lindjen e Mesme, ne jemi të gatshëm ta bëjmë këtë,” shtoi ai.
Sipas Kushtetutës italiane, vendi mund të bashkohet vetëm me organizata ndërkombëtare ku të gjitha shtetet kanë të drejta të barabarta – një kusht që, sipas Romës, nuk plotësohet nga statuti aktual i bordit, i cili i jep Trump-it kompetenca të gjera ekzekutive.
Kryeministrja italiane Giorgia Meloni, e afërt me Trump, tha muajin e kaluar se kishte kërkuar nga ai të ndryshonte kushtet e Bordit të Paqes që Italia të mund të bashkohej.
