Kryetari i Prishtinës, Përparim Rama, ka dhënë lajmin e mirë për rikthimin në funksion të Galerisë së Qytetit. Hapësira që dikur mblidhte intelektualë e aktivistë, do të jetësohet sërish.
“Një lajm fantastik për Kryeqytetin. E rikthyem Galerinë e Qytetit. Aty ku dikur mblidheshin intelektualë e aktivistë për të ngritur jetën kulturore, politike e sociale të Kosovës”, ka shkruar Rama në rrjetin social Facebook.
I pari i kryeqytetit ka theksuar se kjo hapësirë, më parë shërbente për një lokal afarist. E tash, shumë shpejt, pritet të happen dyert për një ekspozitë unike.
“Pranë ëmbëltores legjendare ‘Elida’, për dekada, kjo hapësirë ishte shndërruar në lokal afarist. Ne si Kryeqytet e kthyem këtë hapësirë dhe dhe së shpejti galeria do të rihapë dyert me një ekspozitë kushtuar artistëve tanë, atyre që me art mbajtën gjallë idealin”, ka shkruar Rama.
“Ky është rikthimi i kujtesës sonë kulturore, aty ku arti, rezistenca dhe vizioni për të ardhmen bashkohen sërish”, përfundoi postimi i Ramës në Facebook.
