Ministria e Punëve të Jashtme, që drejtohet nga Enver Hoxhaj i PDK-së ka paguar qira për banesat që nuk janë shfrytëzuar fare.
Auditori ka treguar se MPJ në Ambasadën në Bernë, kishte paguar shpenzimet e qirasë deri në muajin shtator 2016 në vlerë prej 14,166 euro për banesën, e cila kishte qenë në shfrytëzim të konsullit, i cili kishte shërbyer deri më 30 nëntor 2015.
Sipas zyrtarëve të MDK-ve, pagesa e qirasë ishte bërë për ruajtjen e saj për të emëruarit e rinj. Megjithatë, askush nga diplomatët e rinj nuk kishte pranuar të akomodohej në këtë banesë, shkruan Gazeta Fjala.
Auditori ka konstatuar se “ Pagesa e shpenzimeve të qirasë pa u shfrytëzuar nga MDK-të është keqpërdorim i parasë publike si dhe ndikon në rritjen e shpenzimeve pa e përfituar kundërvlerën e tyre.”
Ndërsa rekomandon Ministrin që “ të sigurojë kontrolle efikase në menaxhimin e parasë publike nga MDK-të. Pagesat të realizohen vetëm për mallrat apo shërbimet e përfituara. Në rastet e ndërprerjes se përfitimit të shërbimeve të ndërpriten kontratat.” /Gazeta Fjala/.
