Kryetari i PDK-së, Memli Krasniqi ka folur para mediave pas tentimit numër 52 për të konstituar Kuvendin e Kosovës.
Ai fillimisht foli për intervistën e ish-presidentit, Hashim Thaçi mbrëmë në “Rubikon”, transmeton lajmi.net
“Ka qenë emocionuese me i dëgju me zë të tjetër kujt fjalët e presidentit Thaçi. Shumë prej atyre fjalëve i kam dëgjuar në takime e vizita që i kemi me të në Hagë. Ajo që e ka veçuar atë intervistë, gati 5 vite pa qenë prezent fizikisht, ai dha shumë dashuri për Kosovën e qytetarët, por edhe shpërfaqi një vizion krejtësisht racional dhe të mençur politikë se çka duhet të bëj Kosova sot. Pa e pasur involvimin direkt, me një distancë kohore nga angazhimi publik, pati shumë këshilla që secili politikanë do të duhej t’i merrte parasysh, sidomos në pozicionin e Kosovës në ndryshimet gjeopolitike që kanë ndodhur. E kemi parë që është rezervu shumë në komentimin e politikave ditore, këtë e bën edhe në vizitat që i kemi atje. Këshilla kryesore ka të bëj me ruajtjen e pozicionit të Kosovës në raport me miqtë ndërkombëtar, në radhë të parë me ShBA-të me të cilët realisht i kemi arritur të gjitha sukseset e vendit tonë.”, tha Krasniqi fillimisht.
Tutje, i pari i PDK-së foli për vendimin e Kushtetueses, duke thënë se janë të obliguar ta zbatojnë.
“Është masë që e ka vendosur gjykata ex-oficio, ne se kemi kërkuar atë masë, por është në të drejtën e tyre. Po besoj ka një arsye, që s’dua të paragjykoj unë. Cila është arsyeja, do ta kuptojm kur të publikohet aktgjykimi. Vendimet e Kushtetueses nuk janë tavolinë suedeze që disa i zgjedhim me i implementu e disa jo sepse nuk na pëlqejnë. Ne jemi të obliguar t’i zbatojmë. Ajo që po dihet që kanë mbetur më pak se 48 orë për sa i përket mundësisë që të konstituohet Kuvendi, bazuar në aktgjykimin e kaluar.”, shtoi ai.
Në fund, Krasniqi e la të hapur mundësinë që të shkohet në zgjedhje të reja.
“Po shpresoj që të publikohet para datës 8 gusht. Ne jemi në një situatë absurde, që nuk e ka paramenduar askush. Kanë kaluar muaj e muaj, jo vetëm nga zgjedhjet, por edhe nga fillimi i seancave konstituineve, bllokada politike që po na imponon VV po vazhdon. Ka paqartësi për hapat e mëtejm.
Qytetarët kanë treguar se nuk e durojnë sistemin monist që e ka instaluar VV. Më shumë ka qenë tendencë për sundim se sa për qeverisje. Meqenëse kjo nuk ka ndodh, ndonjëherë nuk është e jashtëzakonshme që t’i kthehemi kutive të votimit, përkundër që do të ishte e mundimshme sepse ne kemi zgjedhjet lokale, pastaj e kemi balotazhin, një proces tjetër zgjedhor do të ishte i mundimshëm. Në fund të fundit demokracia funksionon kështu. Ne Bullgari, në 4 vitet e fundit janë mbajtur zgjedhejt 5-6 herë, sigurisht nuk është shembull i mirë. Nëse një gjë e tillë imponohet prej kryeneçësisë së partisë që ka dal e para, atëherë mund të shkojm në zgjedhje.”, përfundoi ai./lajmi.net/
