Pas publikimit të intervistës së reperit Fero në podcastin “Mirëmbrëma Yje” me moderatoren Arbana Osmani, rrjetet sociale janë përfshirë nga reagime të shumta.
Në intervistë, Fero u rikthye pas një kohe të gjatë në vëmendjen e publikut, duke folur për jetën personale, ndarjen nga ish-bashkëshortja Arbenita Ismaili, si dhe akuzat që i ishin bërë për dhunë. Ai theksoi se Arbenita ka pasur një rol të rëndësishëm në jetën e tij dhe se ende ruan respekt për të.
“Unë nuk e kam dhunuar kurrë. E kam dashur shumë, por nuk jemi për njëri-tjetrin,” u shpreh ndër të tjera Fero, deklaratë që ngjalli reagime të shumta në publik.
Një nga reagimet më të forta erdhi nga ish-banorja e Big Brother Vip Kosova, Juliana Nura, e cila u shpreh ashpër kundër çdo forme dhune ndaj grave.
Në një postim në Instastory, ajo shpërndau një pjesë nga intervista e Feros, duke shkruar me tone të forta:
“Kur e don dikë, nuk e rraf atë o magar! E krejt ju magarë tjerë që e abuzoni gruan apo femrën tuaj”.
Postimi i Nurës u përhap me shpejtësi në rrjete sociale, duke shkaktuar debate mes ndjekësve. Disa e vlerësuan reagimin e saj si të drejtë dhe të guximshëm, ndërsa të tjerë e panë si të tepruar. /Indeksonline/
