Deputeti i Lëvizjes Vetëvendosje, Dardan Molliqaj i është gëzuar vendimit të Kryesisë së partisë për takim me Grupin Parlamentar për të gjetur rrugëdalje nga kriza në parti.
Ai ka paralajmëruar se do të marrë pjesë në këtë takim, ndërsa ka shprehur zhgënjimin e tij që anëtarja e Kryesisë, Dejona Mihali, ka votuar kundër këtij propozimi.
Molliqajt po ashtu nuk i ka pëlqyer as abstenimi i anëtarëve të kryesisë, Albin Kurtit, Albulena Haxhiut dhe Xhelal Sveçlës, rreth propozimit.
Lexoni më poshtë postimin e plotë të Molliqajt:
Lajm shumë i mirë për Lëvizjen, aktivistët e saj si dhe për të gjithë simpatizuesit tanë vendimi i djeshëm i Kryesisë së Lëvizjes për takim të përbashkët me Grupin Parlamentar për të gjetur rrugëdalje nga kjo krizë, takim ky në të cilin padyshim se do të marrë pjesë.
Falenderoj të gjithë ata që e mbështetën këtë iniciativë në të mirë të Lëvizjes. Vetëm në këtë mënyrë mund t’i tejkalojmë problemet që kemi.
Megjithatë, ndihem tepër i zhgënjyer që anëtarja e kryesisë Dejona Mihali votoi kundër këtij propozimi, ndërsa deputetët të cilët janë edhe anëtarë kryesie, Albin Kurti, Albulena Haxhiu dhe Xhelal Sveçla abstenuan dhe nuk votuan pro kësaj iniciative.
