Anëtarët e Komisionit Parlamentar për Shëndetësi janë mbledhur sot për të diskutuar në lidhje me gjendjen në fushën e shëndetësisë, pandeminë e vaksinat.
Me këtë rast, ka pasur përplasje mes kryetares së këtij komisioni Fatmire Kollçaku, dhe ish-ministrit të Shëndetësisë dhe deputetit të LDK’së, Armend Zemaj.
Zemaj ka deklaruar se është ngritur dyshimi për mos raportimin e numrave real të të vdekurve nga COVID-19, duke thënë se kjo përbën skandal.
Ai ka kërkuar të dijë se çfarë lloje të testimeve po raportohen në statistikat e testimeve për Covid-19.
“Cilat lloje të testimeve janë duke u raportuar, PCR, serologjik, Antigen, Rapid? Cilat janë duke u raportuar si statistika zyrtare. Nëse saktësohet kjo që po e thotë deputeti Bekim Haxhiu, që pacientët post-Covid si pasoj e Covid’it kanë përfunduar me fatalitet dhe fshihet ky numër, ky është mashtrim. Nëse ata pacientë kanë qëndruar 6 javë të shtrirë në spital, duhet të raportohen. Nëse raportohet se një pacient është shtrirë dhe nuk është evidentuar që pas dy jave ka vdekur atëherë kjo është mashtrim”, ka deklaruar ai.
Kurse kryetarja e Komisionit për Shëndetësi, Fatmire Kollçaku, deklaroi se Zemaj po hedh dyshime mbi stafin shëndetësorë dhe se ai duhet t’i gëzohet mosregjistrimit të viktimave.
“Ju po hidhni dyshime te stafi shëndetësor, në vend që të gëzoheni që nuk ka pasur raste të vdekjes”, ka deklaruar ajo.
