Të pafuqishëm dhe të frustruar

Jemi të bashkuar si politikanë të pozitës dhe të opozitës, si qytetarë të Kosovës, të gjithë ne, në një pafuqi dhe frustrim të paparë në këta tetë vjet të ekzistimit të shtetit të Kosovës.

Nuk mbahet në mend, në politikën kosovare që prej se Kosova është bërë shtet i pavarur, një demonstrim i këtillë i frustrimit dhe i pafuqisë i udhëheqësisë së vendit, siç ndodhi të premten e kaluar, në mbledhjen e Këshillit kombëtar të Presidentit të Kosovës për integrime evropiane.