Qeveria e Kosovës sot ka mbajtur mbledhjen, në të cilën u prezantua projektligji për kategorizimin e pensioneve për veteranët luftëtarë në kategori.
Me ligjin e ri veteranët janë ndarë në tri kategori, sipas të cilave do të marrin edhe pensionet.
Neni 16 A i ligjit thotë se kategorizimi i veteranit luftëtarë të UÇK-së, si përfitues i pensionit dhe beneficioneve tjera, përcaktohet në përputhje me kohën e mobilizimit dhe shërbimit në UÇK, transmeton Koha.net.
Në kategorinë e parë janë veteranët, të cilët janë mobiliuar në luftë prej vitit 1991 deri më 5 mars 1998 dhe kanë qenë aktivë deri në ditën e përfundimit të luftës.
Kjo kategori do të marrë pensionin prej 250 eurove.
Kategoria e dytë, janë veteranët, të cilët janë mobilizuar në luftë pas datës 5 mars 1998 dhe kanë qenë aktivë deri në përfundimin e luftës. Kësaj kategorie do t’i takojnë 170 euro pension.
Kategoria e tretë është për veteranët e UÇK-së të cilët janë mobilizuar në luftë pas datës 31 mars 1999 dhe kanë qenë aktivë deri në ditën e përfundimit të luftës, si dhe veterani i mobilizuar në luftë nga viti 1991, përkatësisht pas 5 marsit 1998, por që nuk ka qenë aktiv deri në ditën e përfundimit të luftës. Kjo kategori do të përfitojë 120 euro pension.
