Kryetari i Komunës së Drenasit, Ramiz Lladrovci ka uruar me rastin e Ditës Ndërkombëtare të Gruas.
Lladrovci ka zgjedhur që me një fotografi të figurës së ish-ushtares së UÇK-së, Xhevë Krasniqi – Lladrovci, të ndajë një dedikim me rastin e shënimit të 8 Marsit, duke potencuar përkushtimin e grave kosovare për arritjen e lirisë në të gjitha mënyrat, njofton Klan Kosova.
”Urime 8 Marsi, për të gjitha nënat, gratë e motrat,
Në këtë ditë të shënuar, përgëzoj nënat, gratë e motrat që me përkushtim, ngritën dhe edukuan heronjtë, dëshmorët, martirët, veprimtarët, invalidët dhe veteranët e Ushtrisë Çlirimtare të Kosovës, të gjitha ato që kontribuuan dhe u bënë krah i baballarëve, vëllezërve e burrave të vet, me pushkë e me pendë, në të gjitha mënyrat, për arritjen e lirisë së Kosovës.
Në këtë ditë, kujtojmë me nderim të thellë, heroinën Xhevë Krasniqi-Lladrovci, mësuesen dhe edukatoren, luftëtaren dhe bashkëshorten, e nëpërmjet personalitetit të saj edhe të gjitha gratë që dhanë kontribut për çlirimin dhe përparimin e vendit tonë.
Nëna, gra e motra, urime 8 Marsi!”
