Kryeministri i Shqipërisë, Edi Rama, po zhvillon një vizitë zyrtare në Athinë, aty ku pritet të ketë takime të rëndësishme.
Rama, siç raporton TopChannel, pritet të takohet me ambasadoren amerikane në Greqi, Kimberly Guilfoyle, ku më pas do të darkojnë.
Kreu i qeverisë shqiptare do të zhvillojë një vizitë pune në Greqi, me ftesë të Forumit Ekonomik të Delphit, (21-23 prill) një platformë ndërkombëtare e nivelit të lartë, e cila çdo vit bën bashkë liderë politikë, përfaqësues të biznesit, akademikë dhe ekspertë nga e gjithë bota.
Në forum do të diskutohet për sfidat kryesore globale, për të nxitur dialogun ndërkombëtar, për të shkëmbyer ide dhe për të kontribuar në hartimin e politikave që promovojnë zhvillimin e qëndrueshëm dhe bashkëpunimin rajonal e global.
Kryeministri Rama do të zhvillojë një takim me homologun e tij grek, Kyriakos Mitsotakis, me fokus forcimin e marrëdhënieve dypalëshe, thellimin e bashkëpunimit ekonomik dhe ecurinë e punës së përbashkët për dokumentin e ri të partneritetit strategjik mes dy vendeve, për të cilin janë angazhuar ekipet e ministreve të jashtme të dy vendeve.
