Rama: Siguria në Kosovë është stabile, shqetësuese mbetet lufta hibride e Serbisë

Anëtari i Komisionit për Mbikëqyrjen e Agjencisë së Kosovës për Inteligjencë (AKI) nga Partia Demokratike e Kosovës (PDK), Rrahman Rama, ka thënë se situata e sigurisë në Kosovë është stabile, por ka shprehur shqetësim për kërcënimet e vazhdueshme nga Serbia dhe luftën hibride në rajon.

Këto deklarata i bëri pas raportimit të drejtorit të AKI-së, Petrit Ajeti para Komisionit.

Ai ka thënë se gjatë takimit janë diskutuar zhvillimet e sigurisë në Kosovë, rajon dhe më gjerë, përfshirë kërcënimet hibride dhe sulmet kibernetike.

“U informuam për situatën e sigurisë, sidomos kërcënimet që mund të vijnë edhe që janë permanente nga ana e Serbisë, që realisht gjithë jemi ë të shqetësuar me këtë çështjen e e luftës hibride që po ndodhin, jo vetëm në Kosovë, por edhe në regjion dhe më gjerë, dhe diskutuam edhe morëm informacione për situatën e sigurisë edhe këtu, por edhe më gjerë, në nivelin, po mendoj në nivelin rajonal, por edhe global”, tha Rama.

Deputeti i PDK-së ka bërë të ditur se anëtarët e Komisionit kanë parashtruar pyetje dhe kanë shprehur gatishmërinë për të mbështetur AKI-në në përmbushjen e detyrave të saj.

“Bëmë disa pyetje, domethënë që janë legjitime, që ne shprehëm gatishmërinë që edhe drejtori dhe agjensioni tonë t’i shprehëm përkrahje dhe çdo nevojë dhe çdo mundësi që e kemi që të jemi sa më të sigurtë edhe si vend, por edhe ta ketë përkrahjen tonë, jo në diçka nga gjë”, tha ai.