Pas kërkesës së kryeministrit, Ramush Haradinaj, Flamur Sefaj i Aleancës Kosova e Re sot ka dhënë dorëheqje nga posti i ministrit të Punëve të Brendshme.
Kjo kërkesë e Haradinajt erdhi pas arrestimit të gjashtë shtetasve turq në Kosovë javën e kaluar si dhe deportimin e tyre për në Turqi, shkruan Indeksonline.
Sefaj para pak çastesh ka pranuar të jap dorëheqje, duke thënë se ai nuk ishte faktor vendimmarrës për arrestimin e turqve dhe se vetëm e ka zbatuar ligjin përkitazi me kërkesën e AKI-së.
Ndërkaq, pavarësisht dorëheqjes së Sefajt, AKR-ja do të mbetet në koalicion me PAN-in.
Zyrtarë në Aleancën Kosova e Re thonë se kjo ministri u takon prapë atyre.
Sekretari organizativ i AKR-së, Rrahim Pacolli në një prononcim për Indeksonline ka treguar se kush do ta udhëheq tani këtë ministri.
Sipas tij, Ministria e Punëve të Brendshme prapëseprapë i takon AKR-së së Behgjet Pacollit.
“Ajo ministri është e AKR-së dhe ne veçse e kemi atje një zëvendësministër për ta zëvendësuar atë (Sefajn). Nuk kam informata nëse partia ka vendos për ndonjë emër tjetër”, ka thënë Pacolli.
Deri në emërimin e ministrit të ri, sipas Pacollit u.d ministër do të jetë Abdulselami Shkodra i AKR-së./Indeksonline/
