Kandidatja e Vetëvendosjes për presidente, Vjosa Osmani, të premten, në mbyllje të fushatës në Prishtinë, tha se më 14 shkurt, do të vuloset pensionimi politik, siç tha ajo, i atyre që kanë kapur shtetin dhe kanë dëmtuar çdo qelizë të tij.
Osmani tha se vota për VV-në të dielën, është votë për siç tha ajo, çkapjen e shtetit.
“Asgjë më të mirë e më të ngrohtë nuk kemi marrë këto ditë sesa vullneti e dashuria anekënd Kosovës. Cila është porosia që e kemi marrë – është 127. Vota për 127, është votë kundër korrupsionit, kundër kapësve të shtetit. Hapni rrugë se ndryshimi po vjen”, tha ajo, për çka turma në sheshin Skënderbeu në Prishtinë u nxit dhe nisi të thërrasë “Hajnat në burg”.
Ajo po ashtu tha se zgjedhjet e 14 shkurtit janë më shumë se zgjedhje, sipas saj edhe referendum.
“Më 14 shkurt, do t’ju hapim pensionimin politik atyre që thonë se qytetari nuk vendos. Pas 14 shkurtit do ta japim qeverinë e shpresës, jo për 52 ditë, por për katër vjet të plota”, shtoi ajo. Isa Mustafa kishte deklaruar se qytetarët nuk vendosin se kush e udhëheq qeverinë.
