Policia rajonale e Gjakovës e ka dorëzuar në Prokurorinë Themelore të Gjakovës kallëzimin penal ndaj ministrit të Diasporës, Dardan Gashit, si dhe të tjerëve, të cilët shihen duke gjuajtur me armë në një video të publikuar ditë më parë nga mediet në vend.
Zëdhënësja e Policisë së Kosovës për rajonin e Gjakovës, Lirije Podrimaj ka thënë për Telegrafin se janë ndërmarr disa veprime operativo-hetimore, ndër to janë intervistuar disa persona dhe rasti i kompletuar i është dorëzuar me kallëzim penal Prokurorisë Themelore në Gjakovë.
“Policia e Kosovës, respektivisht stacioni policor në Malishevë pas marrjes së informatës ka iniciuar rastin dhe në bashkëpunim me prokurorin e shtetit ka filluar me procedurat hetimore. Gjatë punës hetimore me autorizimin e prokurorit janë ndërmarr disa veprime operativo-hetimore ndër to janë intervistuar disa persona dhe rasti i kompletuar i është dorëzuar me kallëzim penal Prokurorisë Themelore në Gjakovë”, ka thënë Podrimaj.
Telegrafi mëson se bëhet fjalë për ministrin e Diasporës, Dardan Gashi dhe të tjerëve lidhur me këtë rast.
Gashi dhe disa persona tjerë po festonin shpalljen të pafajshëm nga Gjykata të zëvendëskryeministrit Fatmir Limaj si i dyshuar për korrupsion.
Ndryshe, një ditë më parë, Grupi parlamentar i LDK-së ka kërkuar një interpelancë për kryeministrin për tu njoftuar në detaje lidhur me këtë rast dhe njëkohësisht ka kërkuar shkarkimin e zëvendëskryeministrit, njëherësh ministër i Diasporës, Dardan Gashit.
Sipas LDK-së, sjellja e ministrit Gashi mbi të gjitha bie ndesh me etikën e lartë që duhet të kenë zyrtarët e institucioneve të shtetit.
Telegrafi ka provuar të kontaktoj me zëvendëskryeministrin Dardan Gashi, por i njëjti nuk ka hapur telefonin. /Telegrafi/
