Shefja e Grupit Parlamentar të LVV-së, Arbërie Nagavci, ka marrë fjalën në Kuvendin e Kosovës ku edhe ka folur për veprën dhe qëndrimet e Rexhep Qosjes.
Nagavci ka thënë se po të ndiqej logjika e Qosjes, situata aktuale me presidentin s’do të kishte shumë mjegull.
“Nëse do të ndiqnim logjikën e Rexhep Qosjes, kjo situatë s’do kishte shumë mjegull. Kur vendimi shtyhet për arsye partikulare partiake, përgjegjësia është shmangur. Ne si shumicë e kemi të qartë qëndrimin tonë, ky proces duhet të përmbyllet, sepse shteti nuk mund dhe s’duhet të mbahet pezull”, ka thënë Nagavci, shkruan Express.
Ajo tutje ka thënë se presidenti duhet të përfaqësojë unitetin dhe se ky unitet nuk ndërtohet duke mos marrë pjesë e duke bllokuar, por duke vendosur.
“Presidenti duhet të përfaqësojë unitetin e Republikës. Por uniteti nuk ndërtohet duke mos marrë pjesë, duke bllokuar. Ndërtohet duke vendosur. Shteti s’pret, ai kërkon vendime. E dimë se çfarë do të na thoshte Qosja po të ishte në këtë sallë”, ka shtuar ajo
