Komuna e Skenderajt ka marrë vendim zyrtar për ndalimin e përdorimit të mjeteve piroteknike gjatë festave të fundvitit, me qëllim ruajtjen e rendit publik, sigurisë së qytetarëve dhe qetësisë së përgjithshme, shkruan Drenica Press.
Me Urdhëresë Nr. 02-352/01-0054409/25, të datës 26.12.2025, të nxjerrë nga Kryetari i Komunës, z. Sami Lushtaku, ndalohet ndezja e fishekzjarrëve dhe përdorimi i të gjitha produkteve piroteknike në të gjithë territorin e Komunës së Skenderajt.
Ndalimi përfshin të gjitha vendet publike, zonat e banuara, rrugët, trotuaret, sheshet, parqet dhe hapësirat e tjera publike. Kjo masë do të jetë në fuqi nga data 26 dhjetor 2025 deri më 03 janar 2026.
Si përjashtim, përdorimi i mjeteve piroteknike do të lejohet vetëm natën e ndërrimit të viteve, më 31 dhjetor 2025, në intervalin kohor nga ora 23:30 deri në 00:30, për një orë.
Komuna ka bërë të ditur se çdo person që vepron në kundërshtim me këtë urdhëresë do të ndëshkohet sipas legjislacionit në fuqi. Për zbatimin e vendimit do të kujdeset Drejtoria e Inspektoratit Komunal, në bashkëpunim me institucionet përkatëse.
Autoritetet komunale u bëjnë thirrje qytetarëve për mirëkuptim dhe respektim të vendimit, në mënyrë që festat e fundvitit të kalojnë në qetësi, siguri dhe pa incidente.
