Policia e Kosovës ka arrestuar të dyshuarin për vrasjen e 36-vjeçarit, Florent Ahmetaj nga fshati Rezallë i Komunës së Skenderajt, i cili u vra në një kazino në Komunën e Lipjanit më 20 mars.
Policia ka konfirmuar se është arrestuar i dyshuari për vrasjen që ndodhi në rrugën “Bajram Gashi” në Lipjan.
“Po, është e vërtetë që është arrestuar i dyshuari për këtë rast”, ka thënë për Insajderin, Agron Borovci, zëdhënës i Policisë së Kosovës në Rajonin e Prishtinës.
Në orët e vona të mbrëmjes së 20 marsit 36-vjeçari, Florent Ahmetaj u qëllua për vdekje me armë zjarri në vendin e tij të punës – në një kazino në Lipjan.
Rasti i vrasjes së Ahmetajt dhe një rast tjetër vrasjeje që ndodhi në një kazino muajin e kaluar, shtyn deputetët e Kosovës të miratonin një Ligj të ri për Lojërat e Fatit, përmes të cilit janë ndaluar aktivitetet e lojërave të fatit në tërë vendin. /Insajderi.com
