Mëngjesin e së shtunës, në katër rrethe të Moldavisë janë raportuar shpërthime, ndërsa në terren janë gjetur mbetje të të paktën pesë dronëve.
Dy prej mjeteve ajrore pa pilot u gjetën në rrethin Caușeni. Njëri prej tyre u zbulua në periferi të qytetit Căușeni, ndërsa tjetri pranë fshatit Constantinovca, ku shpërthimi shkaktoi edhe një zjarr në vegjetacion.
Mbetje të tjera u gjetën pranë Krocmazit, në rrethin Ștefan Vodă, mes fshatrave Delacău dhe Puhăceni në rrethin Anenii Noi, si dhe jashtë fshatit Dubovca në rrethin Hîncești.
Nga incidentet nuk pati persona të lënduar. Megjithatë, njëri prej shpërthimeve shkaktoi zjarr në vegjetacion dhe dëmtoi dritaret e një ndërtese aty pranë.
Mbetjet e dronëve u gjetën në distanca të ndryshme nga kufiri me Ukrainën, nga rreth gjashtë deri në 120 kilometra.
Incidentet në Moldavi ndodhën në kohën kur Rusia kreu një sulm masiv ajror ndaj Ukrainës.
Sipas të dhënave të Forcave Ajrore ukrainase, gjatë natës së 3 tetorit Rusia lëshoi gjithsej 157 dronë, ndërsa 131 prej tyre u rrëzuan ose u neutralizuan.
Autoritetet moldave u kanë bërë thirrje qytetarëve të qëndrojnë të qetë dhe të mos u afrohen zonave ku janë gjetur mbetjet e mjeteve ajrore.
