Javën e ardhshme deputetët dhe anëtarët e dorëhequr nga funksionet në Lëvizjen Vetëvendosje, do të dalin me një qëndrim zyrtar se çfarë do të ndodhë me të ardhmen e tyre.
Këtë e ka thënë për KTV-në, Visar Ymeri, i cili para disa ditësh ka dhënë dorëheqje nga kryetari dhe të gjitha funksionet në parti, raporton KTV.
Ai nuk ka dashur të flasë konkretisht për ofertën e Albin Kurtit që të dorëhequrit, duke nisur nga ish-kryetari Visar Ymeri, të kthehen në parti.
“Nuk dua të flas deri javën e ardhshme, atëherë do të kemi një qëndrim zyrtar për këtë çështje”, ka thënë Ymeri për KTV-në nëpërmjet telefonit.
Por më vonë ai ka shkruar një status të gjatë në Facebook ku bënë të ditur se takuar dy herë me deputetin Albin Kurti që nga lirimi i tij nga burgu. Thotë të kenë diskutuar për problemet e brendshme në VV.
Sipas Ymerit, Kurti nuk ka reflektuar dhe nuk ka shprehur keqardhje për, siç thotë ai, “krejt këtë fushatë linçimi e sharjesh, njëherë brenda organizatës e tash së fundi edhe në publik”.
Ai thotë se këto diskutime janë ballafaquar me një problem madhor e që është mungesa absolute e gatishmërisë së Albinit për ta pranuar gabimin e vet.
Ndërsa nuk është shumë optimist edhe për postimet e deklarimet publike për bisedime.
Ndërkohë, të dorëhequrit Dardan Sejdiu e Shqipe Pantina nuk i janë përgjigjur thirrjeve telefonike për të treguar nëse do t’i rishqyrtojnë dorëheqjet e tyre.
Në një postim në Facebook, Albin Kurti ka kërkuar nga të dorëhequrit që të kthehen dhe që të vazhdojnë të punojnë bashkë duke premtuar se nuk do të hakmerret.
