Iluzioni optik që mashtron trurin: Si mund të shihni të kuqe dhe blu në një disk vetëm bardhezi?
Një iluzion optik i pazakontë mund ta mashtrojë trurin duke e bërë të perceptojë ngjyra në një disk rrotullues që në të vërtetë është vetëm bardhezi.
Fenomeni, i cili i ka intriguar shkencëtarët prej rreth dy shekujsh, bën që disa njerëz të shohin nuanca si e kuqja, bluja apo ngjyra të tjera, edhe pse ato nuk janë fizikisht të pranishme në figurë.
Shembulli më i njohur është i ashtuquajturi “Benham’s top” – një disk me motive bardhezi, i cili fillimisht ishte krijuar dhe shitur si lodër.
Kur disku qëndron i palëvizur, modeli duket krejtësisht i zakonshëm. Por sapo fillon të rrotullohet, në zona të ndryshme mund të shfaqen harqe me nuanca të zbehta ngjyrash.
“Kur një model i vizatuar vetëm në bardh e zi rrotullohet, njerëzit ndonjëherë perceptojnë ngjyra që në fakt nuk janë të pranishme”, shpjegojnë studiuesit nga Instituti Kombëtar për Biologjinë Bazë në Japoni.
Ky fenomen njihet si “ngjyrë subjektive” dhe ka qenë një nga misteret më intriguese të perceptimit vizual për afërsisht 200 vjet.
Shkencëtarët përdorën inteligjencën artificiale për të zbuluar arsyen
Në një studim të ri, studiuesit u përpoqën të kuptonin më mirë mekanizmin që qëndron pas këtij iluzioni.
Ata i treguan një modeli të inteligjencës artificiale një version bardhezi të “Benham’s top”.
Modeli ishte trajnuar më parë duke parë video nga natyra dhe duke mësuar të parashikonte se çfarë imazhi do të vinte më pas në një sekuencë.
Ajo që ndodhi ishte befasuese.
Edhe pse imazhet hyrëse nuk përmbanin fare informacion për ngjyrat, në pamjet e parashikuara nga inteligjenca artificiale u shfaqën nuanca të zbehta.
Madje, ngjyrat që gjeneroheshin ndryshonin në varësi të ngjyrave të objekteve në lëvizje që ishin përfshirë në videot me të cilat ishte trajnuar modeli.
Sipas studiuesve, kjo sugjeron se lidhja që truri mëson mes lëvizjes dhe ngjyrës mund të jetë një nga faktorët që bëjnë të mundur shfaqjen e ngjyrave në një stimul që në të vërtetë është bardhezi.
Lexo edhe“Aegyo”, trendi korean që po pushton rrjetet sociale: Të rriturit përdorin zë fëmijëror për t’u dukur më të rinj dhe më të ëmbël
