Grabovci për Specialen: Nuk jam penduar për veprimet e mia, por rrjedhat e mëvonshme më kanë bërë të dyshoj!

Ish-shefi i Grupit Parlamentar të PDK-së, Adem Grabovci, ka folur gjatë marshit në Prishtinë, ku ka shprehur shpresën për lirimin e krerëve të UÇK-së.

Duke folur për votimin e Gjykatës Speciale, Grabovci tha për Indeksonline se nuk është penduar për veprimet e tij, por theksoi se zhvillimet e mëvonshme kanë shtuar dyshimet e tij.

“Asnjëherë s’jam penduar për veprimet që i kam bërë. Por, nëse i kemi parasysh rrjedhat e mëpastajme, kjo më bën të dyshoj. Sikur ta kisha ditur se do të devijonte nga qëllimi thelbësor, absolutisht kurrë nuk do të ishte votuar”, tha Grabovci për indeksonline.

Ai e cilësoi Specialen si një padrejtësi të madhe në drejtësinë ndërkombëtare dhe shprehu besimin se 16 shtatori do të sjellë, sipas tij, një fitore për Kosovën.