Tragjedi në një familje shqiptare në Yarraville, Western Melbourne në Australi. Dje ka humbur jetën në spital, një ditë pas bashkëshortes së tij edhe 29-vjeçari Veton Musai. Të dy u qëlluan me armë zjarri të martën nga babai i vajzës Osman Shaptafaj, i cili më pas qëlloi veten dhe është i plagosur rëndë.
55-vjeçari qëlloi me armë çiftin pas një mosmarrëveshjeje mes tyre në prag të Vitit të Ri, shkruajnë mediat lokale. Vajza, Lindita Musai, 25 vjeçe gjeti vdekjen në vend, ndërsa bashkëshorti i saj Vetoni ka ndërruar jetë dje në spital.
Veton Musai, 29 vjeç, nuk mundi t’i mbijetonte plagëve të marra nga plumbat. Çifti u sulmua nga babai i vajzës në shtëpinë e tyre të martën. Ndërkohë 55-vjeçari është në gjendje të rëndë në spital pasi qëlloi veten me të njëjtën armë.
Policia e Victorias po heton një mosmarrëveshje familjare si motivin e sulmit vrasës në vigjiljen e Vitit të Ri.
Çifti raportohet se kishin edhe mysafirë të tjerë në shtëpinë e tyre kur ndodhi ngjarja. Ata u gjetën në hyrjen e përparme të shtëpisë së tyre me plagë të shumta në trup të shkaktuara nga armë zjarri. Arma u gjet në fund të rrugës. Hetuesit tani janë duke u përpjekur të bashkojnë pjesët e ngjarjes për të zbuluar se çfarë e shtyu 55-vjeçarin të hapte zjarr.
Zonja Musai ishte e punësuar si recepsioniste për Colliers International në CBD, Melbourne ndërsa burri i saj punonte në një bankë aty pranë.
