Barcelona nuk do të ndjekë transferimin e Joao Cancelo gjatë afatit kalimtar të janarit. Sipas MARCA, trajneri Hansi Flick ka qenë i qartë se nuk është i interesuar për rikthimin e mbrojtësit portugez, pavarësisht faktit se lojtari i është vetëofruar klubit për t’u larguar nga Arabia Saudite.
Fillimisht, katalanasit pritej të hynin në merkato për të gjetur një zëvendësues për Andreas Christensen, por emri i Cancelo u rikthye në skenë si një opsion potencial me kosto më të ulët. Megjithatë, vendimi përfundimtar i klubit është që fokusi kryesor të mbetet te përforcimi në qendër të mbrojtjes.
Barcelona ka vendosur të mos nënshkruajë lojtarë vetëm për të plotësuar numrin, por vetëm nëse ata përputhen me planet sportive dhe financiare të klubit. Edhe pse ekziston nevoja për një mbrojtës të djathtë rezervë për Jules Kounde, paga aktuale e Cancelo-s prej rreth 15 milionë eurosh në Arabinë Saudite është e papërballueshme për klubin.
Për shkak të strukturës aktuale të pagave dhe prioriteteve në merkato, rikthimi i Joao Cancelo te Barcelona konsiderohet shumë i pamundur, ndërsa klubi do të vazhdojë kërkimin për një mbrojtës qendror që të mbulojë mungesën e Christensen.
