Mesfushori i Real Madrid, Federico Valverde, është liruar nga spitali dhe është rikthyer në shtëpi, raportojnë mediat spanjolle.
Sipas El Mundo, gjendja e uruguaianit është stabilizuar pas incidentit të rëndë që ndodhi gjatë përleshjes me bashkëlojtarin Aurelien Tchouameni në qendrën stërvitore të klubit madrilen.
Valverde kishte përfunduar në spital pas konfliktit fizik, ku sipas raportimeve kishte humbur ndjenjat dhe kishte pësuar lëndime në kokë që kërkuan trajtim mjekësor. Incidenti ka shkaktuar tensione të mëdha brenda klubit dhe ka ngritur shqetësime serioze për atmosferën në dhomën e zhveshjes së Real Madridit.
Megjithatë, lajmi për largimin e tij nga spitali shihet si pozitiv, ndërsa mbetet e paqartë se kur mesfushori uruguaian do të jetë në gjendje të rikthehet në stërvitje me ekipin.
Ndërkohë, Real Madrid vazhdon të shqyrtojë masa disiplinore ndaj lojtarëve të përfshirë në incidentin që ka tronditur klubin vetëm pak ditë para sfidave vendimtare të sezonit.
