Ekspertët e thonë fjalën e tyre për Stadiumin Nacional

Bylbyl Sokoli dhe Gani Sejdiu më moti ishin anëtarë të Këshillit Profesional në Federatën e Futbollit të Kosovës, detyrë e të cilit ishin politikat zhvillimore dhe organizative të futbollit. Por, një kësi trupi punues nuk ekziston më. Sidoqoftë, Sejdiu dhe Sokoli, trajnerë shumë të njohur në vendin tonë, besojnë se lokacioni i Stadiumit Kombëtar nuk duhet të ndryshohet sërish, mirëpo shtojnë se Kosova s’pati nevojë për një stadium të tillë të madh, por për më shumë stadiume të vogla nëpër komuna të ndryshme.

Ndërtimi i Stadiumit Kombëtar të Kosovës në Korreticë të Drenasit e jo në Bërrnicë të Prishtinës ishte kritikuar nga shumë persona, të cilët akuzonin se ky vendim ishte bërë me prapavijë politike, transmeton Gazeta Express.

Së fundi u përfol edhe për mundësinë që të ndërrohet lokacioni i këtij stadiumi sërish. Ndaj këtyre fjalëve reagoi të mërkurën Ministria e Sportit, Kulturës, Rinisë dhe Sportit, që përmes një reagimi këshilloi të mos bëhej kjo gjë.

Edhe trajnerët Bylbyl Sokoli dhe Gani Sejdiu janë të pajtimit se stadiumi i Kosovës nuk duhet të zhvendoset sërish, pasi që tashmëështë marrë vendimi dhe janë bërë testet e nevojshme deri më tani.

Që të dy trajnerët pajtohen se Kosova s’pati nevojë ta ndërtojë një stadium të tillë të madh, por të merret me rinovimin e stadiumeve aktual dhe me ndërtimin e stadiumeve më të vegjël nëpër komuna tjera.

“Unë mendoj që Kosova më tepër ka nevojë të ndërtojë stadiume nëpër qytete, ku mesatarisht duhet të kenë deri në gjashtë mijë ulëse. Të gjitha qendrat kanë nevojë për stadiume, nëse dëshirojmë ta zhvillojmë futbollin”, ka thënë Sokoli në emisionin sportiv “Favorit” në T7.