Në gjimnazin “Kuvendi i Arbërit” në Ferizaj, një mësimdhënës është paguar 3 muaj rresht, pa marrë fare pjesë në procesin mësimor.
Hazir Salihu kishte kërkuar nga Drejtoria e shkollës që ta lirojnë nga puna për afër 3 muaj, meqë i duhej ta shoqëronte bashkëshorten e tij në një udhëtim jashtë shtetit, për shërim.
Mospraninë e mësimdhënësit, e pranon drejtori i gjimnazit “Kuvendi i Arbërit”, Enver Azemi.
Ai po ashtu pranon se pagesa nuk i është ndalur, por ka një marrëveshje me shkrim ndërmjet shkollës dhe Salihut, që ai do t’ia japë pagën mujore profesorit që e ka zëvendësuar atë.
KTV-ja ka dashur të marrë një prononcim nga Salihu, por ai nuk ka qenë në objektin e shkollës, e madje nuk na është siguruar kurrfarë kontakti me të.
po të njëjtën shkollë janë shënuar edhe disa parregullsi tjera.
Për ditën e 28 shtatorit që në Ferizaj njihet si Dita e Dëshmorve, Drejtoria e shkollës kishte njoftuar se nuk mbahet mësim, por mësimdhënësit duhet të jenë prezentë në shkollë.
Megjithëkëtë, mbi 30 mësimdhënës kishin munguar atë ditë.
E, me këtë rast, drejtori i shkollës përveç ankesës në Komunë, këta profesorë nuk i kishte toleruar si Hazir Salihun, por për të gjithë kishte kërkuar që t’u ndalen nga 20 euro nga paga mujore.
Thotë se për këtë veprim i janë ankuar mësimdhënësit, por që ishte i vendosur t’ua shqiptojë dënimin.
Sipas tij, janë të papranueshme këto mungesa të mësimdhënësve, prandaj dënimet çdo herë do të jenë të pashmangshme.
KTV-ja është munduar të marrë një përgjigje nga drejtori në detyrë i Arsimit i komunës së Ferizajt, Muhamet Halili, se si do t’i trajtojë komuna këto raste, por ai nuk ka qenë i qasshëm me gjithë insistimin e vazhdueshëm të ekipit.
