Sot, në ambientet e Këshilli i Bashkësisë Islame në Skenderaj, u realizua një akt i lartë faljeje dhe pajtimi nga familjarët e tashmë të ndjerit Miftar Lushtaku, pas aksidentit tragjik që ndodhi pak ditë më parë në Skenderaj, përcjellë Drenica Press.
Në këtë iniciativë me rëndësi të veçantë morën pjesë kryetari i KBI-së në Skenderaj, Ibrahim Hoti, kryetari i Komunës së Skenderajt, Sami Lushtaku, si dhe përfaqësues të tjerë nga jeta institucionale dhe shoqërore.
Ky akt faljeje dhe pajtimi u vlerësua si një shembull i rrallë i maturisë dhe madhështisë shpirtërore, duke reflektuar traditën fisnike të popullit tonë dhe vlerat e larta të besimit. Familja e të ndjerit, përmes këtij gjesti, dha një mesazh të fortë për rëndësinë e mirëkuptimit, paqes dhe humanizmit në shoqëri.
Pjesëmarrësit theksuan se falja mbetet një nga virtytet më të larta njerëzore, që ndihmon në shërimin e plagëve dhe forcimin e unitetit në komunitet.
Me këtë rast, u lutën që i ndjeri Miftar Lushtaku të shpërblehet me xhenet, ndërsa familjarët e tij të gjejnë forcë dhe shpërblim për këtë veprim shembullor. Njëkohësisht, u bë thirrje që të gjithë qytetarët të tregojnë më shumë kujdes dhe përgjegjësi në jetën e përditshme, në mënyrë që të shmangen tragjedi të tilla në të ardhmen.
