Banorët në Mbretërinë e Bashkuar po këshillohen të tregohen më të kujdesshëm nga marsi deri në tetor dhe të mos dalin nga shtëpia pa një produkt të rëndësishëm me vete: kremin mbrojtës ndaj diellit.
Edhe pse pranvera e hershme dhe vjeshta shpesh sjellin mot të freskët dhe me re, ekspertët paralajmërojnë se rrezatimi ultraviolet mund të jetë sërish mjaft i fortë për të dëmtuar lëkurën.
Specialistët e Cancer Research UK dhe British Association of Dermatologists rekomandojnë që gjatë periudhës mars–tetor njerëzit të marrin masa mbrojtëse ndaj diellit, duke përfshirë përdorimin e kremit mbrojtës dhe mbajtjen e tij me vete për ta riaplikuar kur është e nevojshme.
Kjo periudhë përkon me muajt kur Indeksi UV mund të arrijë nivelin tre ose më lart – pikë në të cilën këshillohet marrja e masave për të shmangur efektet e dëmshme të rrezeve të diellit.
Indeksi UV mat intensitetin e rrezatimit ultraviolet dhe varion nga 1 deri në 11, ku nivelet më të larta nënkuptojnë nevojë më të madhe për mbrojtje të lëkurës dhe syve.
Ekspertët e revistës Which? shpjegojnë se temperaturat mund të mbeten të ulëta, ndaj njerëzit jo gjithmonë e ndiejnë rrezikun në lëkurë, por në pranverë Indeksi UV mund të arrijë lehtësisht në 3 ose 4. Sipas tyre, kjo duhet t’i shtyjë njerëzit të kërkojnë hije gjatë mesditës, të veshin rroba mbrojtëse dhe të përdorin krem kundër diellit.
Ata theksojnë gjithashtu se prilli mund të jetë çuditërisht “djegës” për shkak të disa fenomeneve atmosferike. Sipas UK Health Security Agency, në pranverë mund të ndodhin episode të përkohshme me nivel më të ulët ozoni në hemisferën veriore, duke lejuar kalimin e më shumë rrezeve UVB se zakonisht për atë periudhë të vitit.
Meqë shtresa e ozonit filtron një pjesë të madhe të rrezeve UVB, në ditë të kthjellëta të prillit lëkura mund të ekspozohet ndaj një niveli djegës të rrezatimit, ndonjëherë të krahasueshëm me një ditë vere.
Edhe retë nuk ofrojnë gjithmonë mbrojtje të mjaftueshme. Më shumë se 90 për qind e rrezeve UV mund të kalojnë përmes reve të holla dhe të shkaktojnë djegie. Në disa raste, retë e lehta mund ta rrisin edhe më shumë nivelin e UV-së përmes një procesi të quajtur shpërndarje.
Edhe NHS e mbështet këshillën për kujdes nga marsi deri në tetor dhe thekson se vigjilenca duhet të jetë më e madhe sidomos nga ora 11:00 deri në 15:00. Sipas saj, njerëzit duhet të gjejnë një ekuilibër mes mbrojtjes nga dielli dhe marrjes së mjaftueshme të vitaminës D.
Shërbimi shëndetësor britanik paralajmëron se djegia nga dielli rrit rrezikun për kancer të lëkurës dhe se kjo nuk ndodh vetëm gjatë pushimeve jashtë vendit. Edhe në Mbretërinë e Bashkuar mund të digjeni, madje edhe kur moti është me re.
Cilat janë masat më të mira mbrojtëse?
Një nga mënyrat më të zakonshme për të ulur dëmet nga dielli është përdorimi i kremit mbrojtës. Por ekspertët paralajmërojnë se nuk duhet marrë si e mirëqenë që një shishe e vjetër e mbetur nga vera e kaluar është ende efektive.
Sipas Which?, kremi kundër diellit zakonisht zgjat një ose dy vjet pas hapjes. Prandaj duhet kontrolluar simboli në pjesën e pasme të ambalazhit – zakonisht një kavanoz i hapur – për të parë afatin e përdorimit pas hapjes. Nëse ka kaluar koha e rekomanduar, është më mirë të zëvendësohet me një produkt të ri.
Kremi duhet të aplikohet në të gjitha pjesët e ekspozuara të trupit. Zonat që digjen më shpesh janë hunda, veshët, pjesa e pasme e qafës, shpatullat dhe skalpi. Edhe zona që zakonisht nuk marrin shumë diell, si shputat e këmbëve apo pjesa e pasme e gjunjëve, mund të jenë të ndjeshme.
NHS thekson se kremi mbrojtës nuk duhet të jetë masa e vetme e mbrojtjes. Përveç tij, njerëzit duhet të veshin rroba të përshtatshme dhe të qëndrojnë në hije gjatë orëve kur dielli është më i fortë. /GazetaExpress/
