Lidhja Demokratike e Kosovës ka reaguar sot përmes një komunikate për media, duke theksuar se Kuvendi i Republikës së Kosovës ende nuk është konstituuar dhe çdo veprim që bie ndesh me Kushtetutën përbën shkelje të rendit kushtetues dhe parimeve demokratike të shtetit.
LDK rikujton se Kushtetuta e Kosovës, Rregullorja e Punës së Kuvendit dhe aktgjykimet përkatëse të Gjykatës Kushtetuese janë të qarta dhe të padiskutueshme në përcaktimin e procedurave për konstituimin e Kuvendit.
Sipas kësaj partie, çdo interpretim tjetër apo përpjekje për anashkalim të këtyre dispozitave është i papranueshëm dhe rrezikon funksionimin e institucioneve.
“Vonesat e vazhdueshme në konstituimin e Kuvendit dhe formimin e institucioneve po dëmtojnë rëndë vendin,” thuhet në komunikatë, ku gjithashtu theksohet se përgjegjësia për këtë situatë bie drejtpërdrejt mbi Lëvizjen Vetëvendosje dhe drejtuesin e saj.
LDK shpreh përkushtimin për respektimin e rendit kushtetues dhe funksionimin demokratik të institucioneve, duke bërë thirrje për përmbajtje nga veprimet që cenojnë themelet e shtetit të së drejtës./IndeksOnline/
