Inspektorati i Policisë së Kosovës i ka rekomanduar Policisë së Kosovës suspendimin e katër zyrtarëve policore në drejtorinë rajonale të Policisë në Gjilan.
Kjo për shkak të ngjarjes tragjike që ka ndodhur në Gjilan ku mbeten të vrarë tre persona, teksa të dyshuarit janë në arrati.
Pas ngjarjes ministri i brendshëm Xhelal Sveçla ka kërkuar hetim brenda Policisë.
Në njoftim të Inspektoratit thuhet se i kanë rekomanduar sot Policisë së Kosovës suspendimin për katër zyrtarë policorë.
Njoftimi i plotë:
IPK rekomandoi suspendimin për katër zyrtarë policorë të Drejtorisë Rajonale të Policisë në Gjilan;
Prishtinë/ Gjilan, 11 gusht 2025
Inspektorati Policor i Kosovës ka filluar një hetim paraprak në kuadër të të cilit do të hetohet nëse ka pasur ndonjë lëshim apo përfshirjeje të mundshme të ndonjë pjesëtari të Policisë së Kosovës në veprimtarinë kriminale të të dyshuarit i shpallur në kërkim për vrasjen e trefishtë në Gjilan.
Bazuar në autorizimet ligjore dhe në rëndësinë e ruajtjes së integritetit të hetimit dhe shmangien e çdo ndikimi mbi dëshmitarë apo prova, Inspektorati Policor i Kosovës i ka rekomanduar sot Policisë së Kosovës suspendimin për katër zyrtarë policorë të Drejtorisë Rajonale të Policisë në Gjilan.
Bazuar në rekomandimin e IPK-së janë suspenduar një rreshter policor dhe një hetues nga njësiti i hetimeve rajonale të Drejtorisë rajonale në Gjilan, një rreshter policor – shef i hetimeve në Stacionin Policor të Novobërdës dhe një zyrtar policor i angazhuar në Njësinë e Reagimit të Shpejtë, Drejtoria Rajonale e Policisë Gjilan.
Inspektorati Policor i Kosovës, në koordinim me Kryeprokurorin e Prokurorisë Themelore Gjilan është duke zhvilluar hetime penale paraprake ndaj të lartcekurve lidhur me dyshime për përfshirje në veprimtari të kundërligjshme me elemente të veprës penale.
Hetimet janë në fazën fillestare dhe përfshijnë mbledhjen e provave materiale, marrjen e deklaratave dhe veprime të tjera procedurale.
Me respekt;
Divizioni për bashkëpunim dhe informim
Inspektorati Policor i Kosovës
