Lëvizja Vetëvendosje dhe Lidhja Demokratike e Kosovës kanë vendosur të angazhojnë grupe punuese për definimin e marrëveshjes për koalicion qeverisës që nga sot.
Por, as LVV e as LDK ende nuk ka përcaktuar emrat e zyrtarëve që do të marrin pjesë në negociata.
Nënkryetari i LVV-së Besnik Bisilimi, i kontaktuar nga “Gazeta Blic” tha se ende nuk është vendosur se kush do të jetë pjesë e grupit punues nga partia e tij, por megjithatë shtoi se gjasat janë që ai të jetë njeri prej anëtarëve të këtij grupi.
“Ende nuk është vendosur se kush do të jetë pjesë e grupit punues nga Vetëvendosje, por me gjasë do të jem unë, Glauk Konjufca dhe dikush tjetër”, tha Bislimi, për “Gazeta Blic”.
Në anën tjetër Besian Mustafa, zëdhënës i LDK-së u shpreh i pa informuar, përmes linjes telefonike lidhur me atë se kush është caktuar si anëtarë i grupit punues dhe kërkoi të kontaktohet sërish pas pak minutash, por në përpjeken e dytë të redaksisë ai nuk u tregua i qasshëm.
Ndryshe, krerët e dy partive Albin Kurti dhe Besnik Bislimi nga LVV dhe Isa Mustafa e Vjosa Osmani nga LDK, zhvilluan dje takimin e parë pas zgjedhjeve të 6 tetorit, për të diskutuar për formimin e qeverisë, për çka treguan vullnet për bashkëpunim në këtë aspekt. /Gazeta Blic/
