Në komunën e Skenderajt do të ndërtohen edhe gjashtë shtëpi të reja për familjet në nevojë.
Këtë e ka bërë të ditur kryetari i kësaj komune, Bekim Jashari, i cili ka thënë se kjo do të bëhet e mundur falë bashkëpunimit të mirë mes komunës që drejton ai dhe shoqatës “Jetimat e Ballkanit”.
“Edhe 6 familje të tjera në komunën tonë, do të bëhem me shtëpi të reja. Familja e Rasim Gashit – Rezallë, Hasan Hajrizi – Abri, Bekim Ferizi – Mikushnicë, Bekim Selimi – Kopiliq i Poshtëm, Ajet Xhemajli – Kopiliq i Epërm, dhe Xhemë Xhokaj – Skenderaj, sot morën lajmin e mirë, se do t’u ndërtohen shtëpitë e reja, fal bashkëpunimit të shkëlqyer mes Komunës sonë dhe Shoqatës Bamirëse “Jetimat e Ballkanit”, në bashkëfinancim të projektit tonë të përbashkët, që t’u bëjmë zgjidhje me banim familjeve të cilat jetojnë në kushte shumë të vështira, ku për çdo shtëpi Komuna Skenderaj participon me shumën prej 5000€, ndërsa pjesën tjetër Shoqata Bëmirëse “Jetimat e Ballkanit”, ka thënë Jashari.
Kreu i Skenderajt Bekim Jashari ka falënderuar Kastratin për bashkëpunimin e tyre me të cilin po ua kthejnë buzëqeshjen familjeve nevojtare.
“Në emër të familjeve përfituese, gjithë qytetarëve tanë dhe Komunës, falënderoj hoxhë Halil Kastratin, për këtë bashkëpunim të jashtëzakonshëm, nëpërmjet të cilit po u kthehet buzëqeshja familjeve nevojtare”, është shprehur ai.
