Me të dalë në foltoren e Kuvendit, shefi i GP të Vetëvendosjes, Glauk Konjufca, thirri deputetët e Vetëvendosjes t’ia dërgojnë Ramush Haradinajt kutitë me peticione, me nënshkrime të mbledhura nga qytetarët kundër ratifikimit të Demarkacionit
Konjufca ka thënë se i kanë sjellë në Kuvend zërat e qytetarëve, nënshkrimet e mbledhura në peticionin e krijuar kundër ratifikimit të Demarkacionit me Malin e Zi.
“Edhe vetë personalisht ke bërë shumë përpjekje fizike për me futë këtë peticion në Kuvend, e t’i kemi sjell këtu për me ta kujtu qysh ke ardhë në krye të Qeverisë”, i tha Konjufca kryeministrit Haradinaj, derisa deputetët e VV-së ia dërgonin kryeministrit Haradinaj peticionet te këmbët.
Kujtojmë se tash e dy vjet e gjysmë, në qeverisjen e Isa Mustafës, opozita e bashkuar, kishin ndërprerë seancat për Demarkacionin me anë të hedhjes së gazit lotsjellës në Kuvend. /Express/
