Arbër Avdyli, gazetari i Super Sport Kosovës, i cili intervistoi Ismet Munishin, në incidentin që dje ishte tema kryesore në sportin e Kosovës, i kontaktuar nga Insporti dha versionin e tij dhe disa detajet të reja rreth rastit.
“Fillimisht më duhet të them se kjo është hera e parë që po më ndodhë diçka e këtillë në karrierë dhe kam qenë në pozitë seriozisht të palakmueshme. Munishi e ka ditur që jemi live dhe reagimi i tij nuk mund të arsyetohet assesi” pohon Avdyli për Insporti.
Avdyli thotë se incidenti është pjesërisht pasojë edhe ne natyrës së punës që gazetarët bëjnë. “Kështu e ka puna jonë. Ne intervistojmë njerëzit live, menjëherë pas përfundimit të ndeshjes, kur ende janë gjaknxehtë. Stadiumet në Kosovë janë të tilla që lejojnë që çdokush ose ti afrohet kamerave te tribunat, ose të hyjë që të ofendojë pjesëmarrësit në ndeshje dhe incidente si ky mund të ndodhin. Kjo nuk mund të ndodhë në Evropë”.
Incidenti ndodhi dje në takimin ndëmrhet Dritës dhe Feronikelit, të cilin ekipi mysafir, i prirë nga Munishi, e humbi 0:1.
