Ministri i Financave, Bedri Hamza ka vendosur të mos e zbatojë vendimin e qeverisë për rritjen e pagave. Gazeta Express merr vesh se vendimi për rritje të pagave do të shtyhet për një datë të pacaktuar.
“ Është marrë vendimi. Pagat e qeveritarëve do të dalin pa rritje. Vendimi për rritjen e tyre do të shqyrtohet dhe njëherë. Vendimi zyrtar për këtë çështje bëhet e ditur nesër”, kanë treguar burime të Express brenda Qeverisë.
Ky hap vjen vetëm një ditë pas daljes konstatimit të Agjencisë Kundër Korrupsionit se vendimi i marrë nga ekzekutivi është i kundërligjshëm.
Vendimi i Kryeministrit Haradinaj për rritje pagash të të gjithë kabinetit të tij shkaktoi reagime dhe polemika të shumta nga zyrtarët.
Kryeministri i Kosovës, Ramush Haradinaj, me një vendim ia kishte dyfishuar vetes pagën dhe pesë zëvendëskryeministrave të vet, duke ia kaluar me pagë bruto edhe presidentit Hashim Thaçi e kryetarit të Kuvendit, Kadri Veseli.
Deri më tash paga e kryeministrit ka qenë rreth 1500 euro, deri sa tash e tutje ajo do të jetë 2950 euro.
Po ashtu, me ketë vendim të tij, paga e zëvendëskryeministrit tash e tutje do të jetë 2500 euro, deri sa e ministrave nga 2000 euro./Gazeta Express/.
