Një veturë me targa zyrtare, 3Z -313- 05, është fotografuar duke bartur lakra në fshatin Stanofc të Vushtrrisë.
Fotografia ka mbërritur sot në adresën e Koha.net nga një lexues.
Pjesa e pasme e veturës shihet e mbushur me lakra.
Shfrytëzimi i veturave zyrtare për qëllime private, është cilësuar si problem i madh dhe fenomen në rritje kohëve të fundit.
Qytetarët e Kosovës, shumë shpesh dërgojnë nëpër media fotografi të tilla, ku zyrtarët i shfrytëzojnë veturat për qëllime tjera, jashtë atyre zyrtare.
Edhe pse deri në vitin 2015, 1600 vetura prej 3 mijë veturave zyrtare, janë pajisur me GPS, ato vazhdojnë të mos monitorohen pasi nuk ishin të abonuara në rrjet.
Një kërkesë e tillë është bërë nga Jeton Zulfaj i Lëvizjes “Fol”, që të nxirret një ligj që do të kufizonte dhe rregullonte qasje në veturat zyrtare.
