Kryetari i Komunës së Drenasit, Ramiz Lladrovci me bashkëpunëtor, të shtunën në mbrëmje ka qëndruar në lagjen Zymeri të fshatit Likoshan, ku është takuar me banorët e të gjitha lagjeve të këtij fshati dhe ka marr edhe kërkesat e tyre që janë prioritare, transmeton Drenica Press.
“Ky është fshati më emblematik, me kontributet e jashtëzakonshme në luftën e lavdishme të UÇK-së”, ka thënë Kryetari Lladrovci para banorëve të fshatit Likoshan dhe ka diskutuar me ta për problemet e tyre. Banorët e këtij fshati, prioritet kishin problemet me energji elektrike e cila është e dobët, emërtimin e rrugëve që vlerësuan se nuk janë emëruar disa në pajtim me lagjet, problemet tjera infrastrukturore në rrugë e kanalizim dhe riparimin e shkollës. Kryetari Lladrovci ju tregoi banorëve të fshatit se shumë shpejt do të rregullohet trafoja e re në Drenas dhe problemi i energjisë elektrike në tri fshatrat, Likoshan, Gradicë e Godanc do të zgjidhet dhe se furnizimi i energjisë elektrike për këto tri vendbanime do të angazhohet se nuk do të behët më nga Skenderaj. Ndërsa për emërtimin e rrugëve, ju ka treguar se ato do të behën në konsultim me ta, kurse për projektet infrastrukturore, ju ka siguruar se çështjet e ngritura do të zgjidhen në bashkëpunim me banorët dhe se problemet e tyre do të trajtohen me prioritet.
