Kryetari i Kuvendit të Kosovës, Kadri Veseli, priti mbrëmë në aeroport të përzgjedhurit e futbollit të Kosovës që arritën nga Finlanda, duke i uruar dhe përgëzuar ata për sukses të jashtëzakonshëm. Kryeparlamentari Veseli, i cilësoi futbollistët si heronj të rinj të Kosovës që përfaqësojnë të sotmen dhe të ardhmen e sportit tonë.
“Emocion i papërshkrueshëm t’i presësh heronjtë e rinj të Kosovës, sportistët tanë që përfaqësojnë të sotmen dhe të ardhmen tonë. Loja e parë e tyre është dëshmi e fortë se Kosova është një Brazil i vogël që prodhon talentë për disa kombëtare. I sigurova lojtarët dhe kreun e Federatës së Futbollit, Fadil Vokrrin, se shteti i Kosovës do t’i shpërblej të gjitha sukseset e tyre!”, tha kryeparlamentari Veseli.
Në ndeshjen e mbrëmshme, përfaqësuesja e Republikës së Kosovës, filloi historinë e futbollit, në ndeshjen e parë kualifikuese për botërorin “Rusi 2018”, duke luajtur barazim me përfaqësuesen e Finlandës.
