Sot në Drenas, në praninë e zyrtarëve të lartë të institucioneve, kryetarit të Komunës, Bekim Jashari, nënkryetarit Nuredin Lushtaku, kryetarit të Parlamentit të Kosovës, Kadri Veseli, kryetarit të BDI-së, Ali Ahmeti, kryetarit të Drenasit, Ramiz Lladrovci, gjeneralëve të Ushtrisë së Kosovës, shoqatave të dala nga lufta e Ushtrisë Çlirimtare të Kosovës, familjarëve, dhe një numri të madh të qytetarëve, është bërë zbulimi i shtatores së komandantit Ilaz Kodra, në 20-vjetorin e rënies së tij, 40 dëshmorëve dhe 278 martirëve të kombit.
Kryetari Jashari në fjalimin e tij në manifestim, ka thënë se liria e vendit ishte e shtrenjtë, e paguam me çmim të lartë në një luftë të pabarabartë karshi një okupatori djallëzor.
Fjala e Bekim Jasharit
Pikërisht në 20 vjetorin e rënies së tij, kemi zbuluar shtatoren e komandantit Ilaz Kodra, trimit të rrallë të Ushtrisë Çlirimtare të Kosovës, shokun e ngushtë të Komandantit Legjendar Adem Jashari, që nga stërvitjet ushtarake të vitit 1991, të Fehmi e Xhevë Lladrovcit, Hamzës dhe shumë bashkëluftëtarëve të tjerë çlirimtarë.
Është ditë e shënuar ky përvjetor, për t’i bërë nder sakrificës së Ilaz Kodrës, për lirinë e Kosovës, si dhe të gjithë dëshmorëve dhe martirëve tjerë të kombit.
Ky monument do të lërë përjetë gjurmën e vet ndër shekuj, për pasardhësit tanë, që do ta kujtojnë me respekt sakrificën sublime të Ilaz Kodrës.
Në emër të qytetarëve të komunës së Skenderajt, falënderoj kryetarin Ramiz Lladrovci, që mundësoi ndërtimin e shtatores!
Dita e sotme ka nisur me homazhe te busti i Ilaz Kodrës, tek Kulla e tij në Prekaz, bashkë me nënkryetarin Nuredin Lushtaku, bashkëluftëtarët e Ilazit dhe familjarët, për t’i shprehur nderim sakrificës së tij, për lirinë e Kosovës.
Homazhe gjithashtu kemi bërë edhe në Kompleksin e Dëshmorëve në Marinë, në nderim të 40 dëshmorëve dhe 278 martirëve të Drenicës, në Shtuticë, te Kompleksi i Dëshmorëve, si dhe në fshatin Verbofc.
Kemi qenë të nderuar të marrin pjesë edhe në zbulimin e Lapidarit në kujtim të të rënëve të Çirezit, për nder të Zymer Feratit, Aziz Feratit, Osman Salihut, Lulzim Feratit, Lutfi Salihut e Isuf Feratit.
Lavdi e përjetshme komandantit Ilaz Kodra, lavdi dëshmorëve tjerë dhe martirëve të kombit!
